Nagbinangga ti barko ti China Coast Guard (PCG) ken Philippine Coast Guard (PCG) nga asideg iti Escoda Shoal idiay West Philippine Sea (WPS) ita nga aldaw, sigun iti maysa nga opisial ti China.
Iti naipablaak iti social media platform a Weibo, kinuna ni CCG spokesperson Gan Yu a maatap nga iligal a simrek ti PCG vessels BRP Bagacay ken BRP Cape Engaño iti nasao a lugar nga awanan ti permiso manipod iti China.
Inakusaran ti opisial ti China ti BRP Bagacay nga ingagarada a dinungpar ti CCG vessel.
Sigun kenni Gan Yu, saan nga inkankano ti barko ti Pilipinas nangruna ti BRP Bagacay dagiti pakdaar ti China a nangitunda ti panangbinangga ti dua a barko.
Kinuna ni Gan nga inaramid met ti CCG ti “control measures” kontra kadagiti barko ti Pilipinas.
Immunan a kinuna ni sigud a US Air Force official ken sigud a defense attaché Ray Powell babaen ti social media a kadawyan nga ar-aramaten ti CCG ti water canon kas “control measures” dagitoy.
Para iti CCG, Pilipinas iti responsable iti nasao nga insidente.
