BAGUIO CITY – Nakedngan ti panakabukel ken panakaituding dagiti pagalagadan iti panakaipangruna dagiti emergency cases a maiturong iti Benguet General Hospital (BeGH).
Sigun kenni La Trinidad Mayor Romeo Salda, daytoy ket gaputa agingga ita ket parikotda latta ti kinakurang dagiti isolation beds a pakaiturturongan dagiti agpospositibo iti COVID-19.
Kinunana a napagnumuan ti panakadutok ti focal person a nasken a matawagan nga umuna sakbay ti panakaiturong ti pasyente iti nasao a pagagasan.
Inlawlawagna a nabukel ti pagalagadan kalpasan nga adda dagiti naawatna a reklamo gapu iti saan dagitoy a panaka-asikaso sadiay BeGH ken dadduma kadagitoy ket nag-uray iti ruar ti pagagasan gaputa awanen ti bakante a silid wenno kama para kadagiti pasyente ti COVID-19.
Innayonna a nakasaritanan ti BeGH para iti panaka-asikaso a dagus dagiti pasyente nga adda iti emergency case.
Napagnunumuan pay dagitoy a sakbay a maiturong ti asinoman a pasyente iti BeGH ket nasken a dumalan daytoy iti assessment ti Barangay Health Emergency Response Team ken Municipal Health Office tapnu maamuan no kasapulan a maiturong dagitoy iti ospital wenno saan ket kadagiti laengen isolation facilities.
Maipalagip nga iti agdama ket dagiti laeng makapaspasar iti nakaro a sintomas ti COVID-19 ti ak-akomodaren ti BeGH gapu iti panakapunnon ti COVID-19 ward daytoy.
