BAGUIO CITY – Italtal-o ti Deparment of Tourism (DOT) Cordillera dagiti baro a pagpasyaran iti rehiyon Cordillera
Sigun ken DOT CAR Regional Director Jovita Ganongan, adu dagiti nadiskubre nga addaan iti potensial nga agbalin a napintas a pagpasyaran ditoy Cordillera kabayatan ti pandemya malaksid pay kadagiti siguden a nalalatak a pagpasyaran a daydayuen dagiti turista.
Kinunana a sumagmamano kadagitoy ti Kaparkan Falls, Apao Rolling hills, Panaklisan falls and river ken ti napintas nga ili ti Licuan-baay sadiay probinsia ti Abra.
Iti met Kalinga, lumatlatak ti Balbalasang National Park sadiay Balbalan ken ti kaabay daytoy nga ili a Dangtalan nu sadino binigbig daytoy ti Slow Food gapu iti sustainable farming traditions ken food production nangruna iti heirloom rice.
Innayon na a karaman ditoy ti Mabilong weaving village sadiay Lubuagan Kalinga nu sadino, nabigbig ti Lubuagan kas cultural capital ti Kalinga gapu ta namintinir ti weaving tradition iti nasao nga ili.
Iti met Apayao, mabalin a mapasyar ti Manacota underground river a saan nga agpaudi iti pintas nu idilig kadagiti daduma nga underground rivers iti pagilian.
Innayonna a maysa pay a mabigbig a pagpasyan a mabalin a turungen dagiti bisita ti Yamashita trail sadiay Kiangan, Ifugao.
Kabayatanna, kinuna ni Ganongan a kalpasan ti impatungpalda nga assessment kadagiti newly emerged destinations ket sumaruno ti panangipasdekda kadagiti necessary facilities kadagiti pagpasyaran ken ti pannakipasidong iti kaskenan a training dagiti tour guide kasta met a mainayon ti panagadalda iti history ken culture ti maysa a pagpasyaran nangruna nu daytoy ket addaan iti nabaknang a pakasaritaan.
