BAGUIO CITY – Naisayangkat ti maysa a peace rally ken condemning insurgency action sadiay Bauko, Mt. Province idi kalman kasaruno ti peace rally nga immunan a naisayangkat sadiay munisipyo ti Tadian idi April 9.
Iti panakiyuman ti Bombo Radyo kenni Police Colonel Clarence Casilio, provincial director ti Mt. Province PNP, kinunana a daytoy ket panangipakita iti nainget a panangkondenar dagiti umili ken amin a sektor sadiay kadagiti komunista a rebelde ken kas apela iti panangpanaw ti nasao a grupo iti lugarda.
Indauluan ti municipal government ti Bauko ti nasao a programa ken pinasetan daytoy dagiti pulis, militar, barangay officials, religious sectors, estudyante ken dadduma pay a maseknan a sektor ken dagiti umili sadiay.
Maipalagip a kinuna ti mayor ti Bauko a nasurok sangaribo nga umili iti innem a barangay sadiay ti na-trauma gapu iti napaspasamak nga engkwentro iti nagbaetan ti tropa ti gobyerno ken dagiti komunista a nagresulta iti ipupusay ti dua a pulis ken panakadangran ti 10 a kadwa dagitoy ken iti panaka-apektar ti panagmula dagiti sumagmamano nga umili sadiay.
Nupay kasta, agtalek ni Colonel Casillio a babaen iti panagkaykaysa dagiti umili ken dagiti maseknan nga ahensia iti panangisayangkatda iti panagkondinar ket ipangag dagiti komunista ti apela iti ipapanaw dagitoy sadiay tapnu agsubli metten ti linak ken kappia iti munisipyo.
