Posible a ni Benguet Cong. Eric Go Yap ti kaunaan a nakatugaw a mammanday-linteg ti matiliw mainaig kadagiti mapagduaduaan a flood control projects.
Daytoy ti kinuna ni Department of the Interior Secretary Jonvic Remulla nu sadinno dinakamatna ti “conclusive financial exchange” iti nagbaetan ti mammanday-linteg ken kontraktor nga agassawa a da Sarah ken Curlee Discaya.
Sigun kenni Remulla, karaman ni Yap iti 20 a kameng ti Kamara a mabalin a maibalud inton Enero, nupay kagudua laeng ti addaan iti direkta a pakainaigan kadagiti Discaya ken dadduma pay a kontraktor.
Malaksid kenni Yap, posible a dua pay a senador ti mabalin a maibalud.
“(Yap) will be the first, I think. There’s been a conclusive financial exchange between the accounts of the Discayas and Eric Yap.”
“I think we have 20 (lawmakers) that are expected, but the definite ones, I think there are 10 with direct financial links to the Discayas, to Eric Yap, to all these contractors.”
Department of the Interior Secretary Jonvic Remulla
Kinuna ni Remulla a saan a dumanon iti bulan ti Hunio ti pannakaidarum ken pannakakonbiktar dagiti mammanday-linteg a karaman iti naanomalyaan a flood control projects.
Maipalagip nga itay laeng kallabes, impablaak ni President Ferdinand Marcos Jr. a nangipaulog ti Court of Appeals iti freeze order kadagiti bank accounts, assets, ken aircraft nga adda pakainaiganna iti naanomalyaan a flood control projects a mapapati a karaman ni Yap ken ti kabsatna a lalaki a ni ACT-CIS party-list Rep. Edvic Yap.
Kinuna ni President Marcos Jr. a saklawen ti nasao a pammilin dagiti sanikua ti Silverwolves Construction Corp. nga adda pakainaiganna iti saan pay a nalpas a flood control projects idiay La Union.
Immunan a kinuna ti Ombudsman a ti mammanday-linteg ti Benguet ti “beneficial owner” ti Silverwolves nupay naipadamag a nag-divest daytoy sumagmamano a tawenen ti napalabas.
Mapapati a nasurok P16 billion ti napan kadagiti transaksion ti Silverwolves iti nagbaetan ti 2022 ken 2025, a kaaduan ket manipod kadagiti kontrata ti Department of Public Works and Highways flood control.
Agarup 280 a bank account ti na-freeze, agraman ti 22 nga insurance policies, tallo a securities account, ken walo nga eroplano, agraman dagiti eroplano ken helikopter a mainaig iti Sky Yard Aviation.
Sigun kenni President Marcos Jr., nairanta ti freeze order tapno malapdan ti pannakailako wenno pannakaiwaras dagiti mapapati a saan a nainkalintegan a nagun-od a kinabaknang ken tapno masigurado a maala ti pondo ti publiko, nangruna kadagiti komunidad a nakaro a naapektaran ti panaglayos.
