BAGUIO CITY – Nanayonan ti bilang dagiti barangay iti rehiyon Cordillera a nairaman iti listaan dagiti babbarangay nga addaan presensia ti komunista a grupo.
Sigun kenni Major General Pablo Lorenzo, commander ti 5th Infantry Division ti Philippine Army, dumanon ita iti 61 a barangay iti Cordillera ti apektado kadagiti rebelde a grupo manipud iti sigud a 47 a babbarangay.
Kinunana a maysa a rason ditoy ket ita laeng nainayon ti probinsia ti Abra iti rekord ti 5th Infantry Division.
Inlawlawagna a ti sigud a mangsaksakop iti Abra ket ti 7th Infantry Division ti Philippine Army.
Dinakamatna a dagiti 61 a babbarangay ket masarakan sadiay Abra, Kalinga, Mt. Province, Ifugao ken Apayao ken ti listaan kadagiti nasao a barangay ket naisumitiren iti Regional Task Force to End the Local Communist Armed Conflict iti Cordillera Region.
Kabayatanna, inkari met ni Cordillera Regional Peace and Order Council chair ken Baguio City Mayor Benjamin Magalong a tutukanda dagiti nasao a babbarangay.
Kinunana nga amin nga effort ti regional task force ket maipamaysa kadagiti nasao a babbarangay tapnu marippuog ti panagrebelde bayat nga adda met ti mekanismo para kadagiti dadduma a paset ti rehiyon tapnu mapagtalinaed ti linak ken kappia.
Ninigbig met ti Regional Development Council ken ti Regional Peace and Order Council ti Cordillera ti kinapateg ti panangideklara dagiti lokal a gobyerno kadagiti probinsia ti rehiyon a ‘persona non grata’ dagiti rebelde a New People’s Army (NPA) iti lugar dagitoy.
Sigun kadagiti opisyal ti dua a council, pammaneknek daytoy a seryoso ken agkaykaysa ti entero a rehiyon iti panakarippuog ti rebelde a grupo.
Mangnamnamada pay a babaen iti daytoy ket ad-adda a kumapoy ti pwersa dagiti rebelde iti rehiyon.
Kabayatanna, ididiaya ni Magalong ti kappia kadagiti rebelde ken kinunana a nakalukat ti linya ti komunikasyon kenkuana para iti panakisarita dagiti rebelde.
Mangnamnama daytoy a babaen iti nasao nga aksiyon ket maipaka-awatda nga ar-aramiden laeng ti gobyerno ti amin tapnu mapagtalinaed ti linak ken kappia iti rehiyon Cordillera ken iti pagilian.
