Maidagdagadag kadagiti umili nga agurnong iti ad-adu a danum nu kasapulan kas panagsagana iti manamnama a Super El Niño, gaputa nagballaag dagiti eksperto a mabalin a makapasar iti nakaro a tikag kadagiti maudi a bulan iti agdama a tawen uray manamnama ti panagtudtudona manipod Hunio agingga Setiembre.
Nairuar iti palagip iti maysa a summit idi laeng Mayo 29 seknan iti kinakapoy iti siudad iti kinakurang iti danum, nu sadinno ipagpaganetget dagiti opisial ti kinapateg iti nasapa a panagsagana iti tengnga iti nabayag a pakaseknan iti suplay iti danum iti siudad ti Baguio.
Maisaysayangkaten ti rasyon iti danum iti siudad manipod pay iti umuna a paset iti dekada 1990 gapu iti nakaro a panagaramat iti aquiefier nga agsupsuplay iti danum iti natao a siudad.
Maibasar iti cencus idi tawen 2024, adda ti populasion ti Baguio a dumanon iti 368,426.
Ngimmato pay iti kasapulan iti danum iti oras iti aldaw gaputa dimmakel ti populasion iti nasurok 700,000 gapu kadagiti estudiante, mangmangged, ken turista, sigun kenni City Planning Officer Architect Donna Tabangin.
Kinuna ni Tabangin a karaman iti grupo iti panagadal iti urban carrying capacity idi tawen 2019, nalab-awanen iti siudad ti naikeddeng a kapasidad iti suplay iti danum para iti 267,546 a konsyumer idi tawen 2002 paylaeng.
Gapu iti daytoy, agtultuloy a dumakdakkel ti tinnawen a kinakurang iti danum bayat nga umad-adu ti populasion.
Gapu iti nasao a kasasaad, adu kadagiti pagtaengan ti mangnamnama iti dadakkel a tangke iti pagurnongan iti danum, bayat a dagiti daan a pagtaengan ket mangisaysayangkat iti panagkolektar iti “tubig-ulan” manipod pay idi dekada 1960, maibasar iti maysa a panagadal iti University of the Philippines Baguio idi tawen 2015.
