BAGUIO CITY – Nasuroken iti 45,500 nga umili iti probinsia ti Benguet ti naka-awat iti kompleto a bakuna kontra iti COVID-19 bayat a nasurok 14,200 dagiti agur-uray iti second dose dagitoy kas maibasar iti report ti Provincial Health Office idi Martes, August 17,
Iti panakiuman ti Bombo Radyo Baguio, kinuna ni Governor Melchor Diclas a nairaman iti bilang dagiti fully vaccinated nga umili ti Benguet dagiti d 24,000 a nabakunaan iti single-dose a Janssen COVID-19 vaccine a naawat ti probinsia.
Dinakamatna a ti puntiryada a mabakunaan kontra iti COVID-19 iti probinsia ket dumanon iti 280,000 manipud iti 460,000 a pakabuklan a popolasyon ti Benguet.
Innayonna a posible a mabakunaan amin dagiti puntirya nga umili no napartak ti panagsangpet ti bakuna manipud iti nasyonal a gobyerno.
Pinagyamananna met ti panag-ado dagiti umili iti probinsia a kayatda ti agpabakuna, dagiti umili a nagpabakunan kontra iti COVID-19 ken dagiti amin a vaccination teams kadagiti nagduduma a munisipyo gapu iti agtultuloy a panagsakripisyo dagitoy tapnu laeng maimplementar ti vaccination program ti gobyerno.
