Ngimmato ti bilang dagiti Pilipino a mangngalap idiay Scarborough Shoal wenno Bajo de Masinloc iti baet ti panangimplementar ti China ti pagannurutanda a maibalud dagiti “foreign trespassers” iti South China Sea.
Daytoy ti kinuna ti dadaulo ti Philippine Coast Guard (PCG) ita nga aldaw.
Sigun kenni PCG spokesperson for the West Philippine Sea Commodore Jay Tarriela, manipod Hunio, nangideployda ti dua a barko—ti BRP Sindangan ken BRP Malapascua—tapno agpatrolia iti nasao a baybay a masarakan iti 124 nautical miles ti Masinloc, Zambales.
Idi Hunio a kinse, nakaimatang ti PCG ti tallo a barko dagiti Pilipino idiay Bajo de Masinloc.
Manipod iti pito a barko, nagbalin a sangapulo daytoy.
Maipalagip nga idi Mayo, nangipaulog ti China ti pagannurutan a tiliwenda dagiti ganganaet a “tresspassers” iti South Chine Sea iti agingga innem a pulo nga aldaw a saan a maipasidong iti trial nu sadinno, nag-epektibo daytoy iti Hunio a kinse.
Gapu iti pangta ti China, kinuna ni Joeffrey Elad, president ti Tropical Fish Gatherer Association idiay Masinloc, Zambales a sumagmamano a mangngalap a Pilipino ti nagliklik kadagiti sumagmamano a lugar idiay West Philippine Sea nangruna iti Scarborough Shoal.
Immapela pay daytoy iti gobierno a mangipaay daytoy iti tulong ken seguridad para kadagiti mangngalap a Pilipino a kayatna nga agsubli iti nasao a baybay.
