LA TRINIDAD, BENGUET – Immado ti bilang dagiti turista nga agpaspasyar iti probinsiya ti Benguet ita a tawen nu idilig idi napalabas a tawen.
Iti interview ti Bombo Radyo kenni Eliazar Carias, Tourism Officer ti Benguet, nailistada ti 770,000 a tourist arrival manipud Enero agingga Setyembre ti agdama a tawen.
Dinakamatna a saan pay a naibilang dagiti turista a simmangpet idi napalabas a long weekend.
Malaksid iti daytoy, manamnama pay ti isasangbay ti ad-ado pay a turista nga agbuya iti Adivay Festival a maramrambakan ita a bulan.
Mamati ni Carias a maysa kadagiti rason iti panagngato ti bilang dagiti turista ket gapu kadagiti kabarbaro a tourist spot nangruna dagiti farm tourism site, agri-tourism site ken natural tourist site.
Maibasar iti datus ti Benguet Tourism Office, dagitoy ti kangrunaan a paspasyaren dagiti turista a masarakan idiay Atok, La Trinidad, Tuba ken Tublay.
Nagbaliw daytoy gapu ta idi napan a tawen ket trekking site ti kadawyan a pagturturongan dagiti turista.
Sigun kenni Carias, kaadoan kadagiti turista ket agtataud idiay National Capital Region, Region 3, ken Region 1.//Bombo Mae Bagsang
