BAGUIO CITY – Nailista ti Baguio City ken La Trinidad sadiay probinsia ti Benguet ti nababa a bilang dagiti turista a simmangbay kadagiti nasao a lugar iti baet ti panangipalubos ti National Inter-Agency Task Force a mailukat ti turismo nangrugi idi Abril 16 ti agdama a tawen.
Sigun kenni City Tourism Officer Engr. Alec Mapalo, dumanon laeng iti 40 a turista ti nagrehistro iti VISITA system ti siudad idi napalabas a lawas.
Nupay kasta, kinunana a manamnama a sumangpet ti 700 a turista ita a lawas ken manayonan pay daytoy iti sumarsaruno nga aldaw.
Kabayatanna, impetteng met ni La Trinidad Tourism Officer Valred Olsim a dagiti laeng local tourist ti mabalin a makastrek kadagiti tourist destination ti municipyo tapnu malapdan ti panagwaras ti virus sadiay.
Inayonna nga silulukat pay ti toursit destinations dagitoy kadagiti dadduma a lugar a nakaipasidong iti GCQ ken MGCQ.
Innayonna a pasaysayaatenda dagiti proseso para iti panagparehistro dagiti bisita nga agturturong sadiay La Trinidad.
Impanamnama met dagiti dua nga opisyal a nainget a masurot dagiti minimum health standards kadagiti bisita tapnu masigurado a nasalun-at dagitoy a sumrek iti probinsiya Benguet ken iti siudad ti Baguio.
