Maur-uray paylaeng ti ipaiyulog dagiti maseknan nga opisina seknan iti panakasuspindir ti number coding kadagiti motorista iti Baguio City iti agdama kagiddan ti mapaspasaran nga epekto ti bagyo a Carina.
Iti panakiuman ti Bombo Radyo kenni Julius Santos, Operations Officer ti City Disaster Risk Reduction and Management Office-Baguio, napakaammoanen dagiti amin a motorista a temporaryo a dumalanda iti Marcos Highway imbes nga iti Kennon Road kasaruno ti panakaiserra daytoy gapu iti soil erosion wenno landslide.
Kabayatanna, maur-uray metlaeng ti ipaiyulog ti City Environment And Parks Management Office(CEPMO)- Baguio a bilin seknan iti operasyon dagiti nagduduma a pagpasyaran iti siudad.
Iti agdama, silulukat paylaeng amin dagiti mabalin a pagpasyaran ngem mapalpalagipan ti publiko nga agtalinaed paylaeng dagitoy iti pagtaenganda nu awan ti importante papananda.
Maguyguyugoy met dagitoy nga agreport a dagus kadagiti maseknan nga ahensya nu adda ti makitada nga insidente kas iti panagreggaay ti daga.//Bombo Rob Dominguez
