BAGUIO CITY- Posible a mapilaan iti kaso ti bise mayor ti Pilar, Abra ken dagiti sangapulo ket dua a security guard daytoy depende iti agbalin a taray ti imbestigasion ti pulisya.
Iti panakiuman ti Bombo Radyo Baguio, kinuna ni PCapt. Edwin Sergio, panakangiwat ti Abra PPO, manarimaan pailaeng ti imbestigasion nga ipatpatungpal dagiti otoridad kontra kadagiti simmuko a 12 a sigud a militar nga agdama nga agserserbi kas security guard ni Vice Mayor Jaja Josefina Disono.
Impettengna a saan a rumbeng nga agbuteng dagiti umili ti Abra gaputa ti napasamak a pammaltog sadiay ket adda pakainaiganna iti panaglabsing no sadino nilibasan dagiti nadakamat nga indibidual ti maipatpatungpal a COMELEC checkpoint babaen iti puraw a van a nagluganan dagitoy.
Kinamat ti pulisya ti puraw a van ngem nagpapatutok dagiti nakalugan iti daytoy rason a nakipinnaltog met dagiti otoridad a nangitunda iti ipupusay ti maysa kadagiti private secutiry guard ti bise mayor.
Nupay kasta, impatalged ni Sergio a nakappia ita ti tension sadiay Pilar, Abra kasaruno ti isusuko dagiti 12 a private body guard kasta metten ti 40 a lisensiado a paltog a resulta ti panakipatang ti dadaulo ti PROCOR a ni PBGEN Ronald Oliver Lee iti kampo ni vice mayor.
Kagiddan iti daytoy, impaganetget ni Sergio nga ad-adda pay nga ingetanda ti panagwanawanda kadagiti politicians nga addaan ti private body guard tapno maliklikan ti panakapasamak ti kapada nga insidente.
Iti kaudian a datus, adda ti 38 nga active ken potential politicians nga addaan ti private body guard a bambantayan ti Abra Police Provincial Office.
