BAGUIO CITY – Maipalubosen ti panagbiyahe wenno operasion dagiti UV Express nga addaan ti terminal sadiay La Trinidad, Benguet paturong iti nagduduma a destinasyon.
Nupay kasta, linawlawagan ni Mayor Romeo Salda a daytoy ket iti kanito a malpas dagiti dokumento a kasapulan dagiti maseknan nga ahensia ti gobierno ken organisasyon.
Kinunana a dagiti laeng parapasahero a van nga addaan ruta a La Trinidad-Buguias ti immunan a napalubusan nga agbiyahe kalpasan a nakompleto ti maseknan nga asosasyon dagiti dokumento a kiniddaw ti lokal a gobyerno ken ti sertipikasyon ti LTFRB malaksid pay iti katulagan iti panaka-aramat ti paradaan wenno terminal dagitoy.
Dinakamatna a manarimaan met ti panangisimpa dagiti operators dagiti mini-bus nga addaan ruta a La Trinidad-Kibungan kadagiti dokumento kas iti katulagan iti aramaten dagitoy a paradaan wenno terminal ken ti prangkisa dagitoy manipud iti LTRFB.
Inyunay-unay ni Mayor Salda nga iti kanito a mapalubosan ti operasyon dagiti UV Express ken mini-bus ket nasken nga ipasigurado dagiti drivers ken operators ti panakasurot dagiti health and safety protocols kontra iti COVID-19.
Sigun pay iti mayor, ti panakaipalubos ti biyahe dagiti nasao a parapasahero a lugan ket paset ti kampanya ti lokal a gobyerno para iti in-inot a panagrekober ti ekonomiya daytoy.
