BAGUIO CITY – Pagan-anaden ita dagiti otoridad dagiti amin a dumalan iti nagbeddengan ti Mt. Province ken Kalinga ditoy rehion Cordillera kalpasan ti napasamak nga engkwentro iti nagbaetan ti Betwagan ken Butbut Tribe itay nabiit.
Sigun kenni Kalinga Provincial Director Pol/Col Davy Limmong, agtultuloy ti imbestigasyon ti nagtipon a pwersa dagitoy iti Mt. Province Provincial Police Office iti napasamak nga engkwentro a nakatayan ti maysa a miyembro ti Betwagan tribe.
Kinunana a posible a susik iti nagbeddengan a sakupen ti dua a tribo ti rason ti panagpipinaltog ti grupo.
Immuna metten a kinuna ni Pol. Col Homer Penecilla, Provincial Director ti Mt. Province PNP a nangugi ti insidente idi Lunes kalpasan a maatap nga immalatiw dagiti armado a lallaki manipud Betwagan, Sadanga, Mt. Province iti boarder ti Bugnay village sadiay Kalinga a pagnanaedan ti Butbut tribal folks.
Kinunana a siguden nga adda ti susik ti dua a tribo no sadino immunen a naputed ti maika-innem a “bodong” wenno peace pact dagitoy gapu iti saan pay a narisut a shooting incident idi Pebrero ti agdama a tawen.
Kinuna pay ni Limmong bambantayan itan ti pulisya dagiti nagbeddengan ti dua a probinsiya tapno saanen a maulit ti kapada nga insidente.
