BAGUIO CITY – Posible a maiparikep ti Burnham Lake no agtultuloy a bumaba ti water level ti nasao nga attraction ita a tawen ditoy siudad ti Baguio.
Daytoy ket epekto ti recharching ti aquifer ken subsurface, ken gapu paylaeng iti epekto ti El Niño phenomenon iti siudad.
Iti interview ni Bombo Radyo ken ni Engr. Bonifacio Dela Pena, City Administrator, agtultuloy ti panangisayangkatda iti monitoring gapu ta bimmaban iti normal level nga agarup 3-feet ti danum iti agdama.
Kinunana a kiniddaw ti maseknan nga opisina iti water district ti panangsuplayda ti danum iti nasao a lake tapno ad-adda pay a saan a bumaba ti lebel daytoy.
Impettengna pay nga ar-aramidenda ti kabaelanda tapno maispal dagiti lames iti nasao nga area.
Malaksid iti dayta, kitkitaenda ti panangbalanse iti kanayon a suplay ti danum a maikabil iti Burnham lake ken dagiti kasapulan dagiti umili iti siudad.
Impasigurado met ti nasao nga opisyal nga aramidenda ti nainget a monitoring tapno mabantayan ti danum iti nadakamat a pagpasyaran ken maispal dagiti lames iti uneg daytoy.
Kabayatanna, madanagan met dagiti boat concessionaires iti posible a panakaapektar ti panggedan dagitoy.//Bombo Marinel Rodrigo
