Impaganetget ti Department of Justice nga awanan dagitoy iti impormasyon a nakaruar ni Cassandra Li Ong iti Pilipinas.
Impakaammo-da daytoy kalpasan a kinumpirmar ti Malacanang nga adda paylaeng iti Pilipinas ni Ong.
Nupay kasta, kinuna ni DOJ spokesperson Atty. Polo Martinez, a saanda a makumpirmar ti eksakto a lokasyon daytoy wenno ti posibilidad a nakaruar daytoy iti pagilian babaen iti backdoor channels.
Inyunay-unayda pay a nangidiaya dagitoy iti P1 million a gungguna para iti makaibaga iti impormasyon daytoy.
Gapu iti dayta, agtultuloy a kidkiddawen dagitoy ti tulong ti publiko iti panangipaay iti credible ken umno nga impormasyon.
Kagiddan dayta, impasigurado ti Philippine National Police a pinainget dagitoy ti panagreggetda tapno masarakan ken maarestar ni Ong ken dagiti dadduma pay a naakusaran iti qualified human trafficking nga adda pakainaiganna iti scam hub nga inoperate ti Lucky South 99.
