Pinaneknekan ti korte ti Taguig a “guilty” wenno nagbasol ti businessman a ni Cedric Lee ken tallo a dadduma pay gapu iti “illegal detention for ransom” iti kaso nga impila ni aktor ken TV host a ni Vhong Navarro.
Naduktalan ti Taguig Regional Trial Court (RTC) Branch 153 a da Lee, Deniece Cornejo, Ferdinand Guerrero, ken Simeon Raz ket “guilty beyond reasonable doubt” ken nasentensiaan dagitoy ti reclusion perpetua wenno pannakaibalud ti agingga uppat a pulo a tawen.
Dagos a kinanselar ti korte ti piansa dagiti naakusaran para iti temporaryo a pannakawayawaya dagitoy.
Dagiti personal a timmabuno iti nasao a “promulgation” a da Raz ken Cornejo ket dagos a kinemmeg dagiti otoridad ti korte.
Kabayatanna, nangiruaren ti korte ti warrant of arrest kontra da Lee ken Guerrero.
Imbilin ti Taguig Regional Trial Court kadagiti naakusaran a bayadanda ni Navarro ti P100,000 kas civil indemnity, P100,000 kas moral damages, ken P100,000 kas exemplary damages.
Nupay saan a timmabuno ni Navarro iti hearing, ti legal counsel-na a ni Atty. Alma Mallonga ti nagyaman iti nasao a desision.
Maipalagip nga idi 2014, naakusaran ni Lee ken ti grupona a nangkautibo ken ni Navarro ken kinabkabilda wenno dinangranda ti pisikal daytoy.
