Nagballaag ti maysa a grupo a posible a bumaba ti kalidad ti internet iti Pilipinas iti kanito a maipasa ti linteg a mangkessay kadagiti regulatory powers ti National Telecommunications Commission (NTC).
Sigun iti CitizenWatch Philippines, marikna ti publiko ti panagbaliw ti serbisio apaman a bummasit ti akem ti Telecommunications Commission (NTC) nangruna nu agbalin a linteg ti Senate Bill 2699 wenno ti Konektadong Pinoy Bill.
Iti kanito a maipasa ti Senate Bill 2699, maikkat ti “congressional franchise” para kadagiti kompania ti telekomunikasion, a mangkissay kadagiti regulatory powers wenno pannakabalin ti NTC.
Immunan a kinuna ni Senador Alan Peter Cayetano,a mangisaksakad ti gakat, a ti naisingasing a wagas ket maysa a “landmark bill” a manglukat iti dalan para iti mapagtalkan, makabael, accessible internet connection iti intero a pagilian.
Ngem inyebkas ni CitizenWatch lead convenor Orlando Oxales ti panagdanagna a mabalin a mangipaay daytoy iti dalan kadagiti baro a nga indibidual wenno kompania nga awanan iti teknikal ken pinansial a kabaelan a mangipaay iti mapagtalkan a koneksion kadagiti Pilipino.
Iti agdama, awan paylaeng ti komento ni Senador Cayetano seknan iti nasao a banag.
