BAGUIO CITY – Nagpalawag ti City Permits and Liscensing Division seknan iti saanda a panangipaay ti permit kadagiti agtagikua iti carwash a naibangon iti sirok ti rangtay sadiay Teachers Camp.
Sigun kenni City Permit and Liscensing Officer Allan Abayao, saan a nangisumitir dagiti nasao nga establishemento iti requirements kas ti zoning clearance ken City Environment and Parks Management Office clearance.
Kinunana a naipaayan dagitoy ti closure order idi pebrero ti napan a tawen ngem nailaylayon ti operasionda gapu iti panagraira ti COVID-19 pandemic.
Inayonna a binalakadanda dagiti agtagikua nga agsapulda iti daduma a lugar a pakaiyakaran ti negosyoda ngem agingga iti agdama ket awan paylaeng ti aksion dagiti agtagikua kadagitoy.
Impettengna a dagiti grasa nga agtataud iti carwash ket agturturong iti waig a mangitunda iti negatibo nga epekto iti aglawlaw.
Nupay kasta, pinaglibakan met ti maysa kadagiti negosyante a ni Nelson Badua nga insumitirda dagiti makidkidaw a dokumento.
Impaganetgetna pay a nangimuntardan ti grease track tapno saan nga agturong iti waig dagiti grasa a nausar kadagiti lugan.
Iti agdama ket agtultuloy pailaeng ti operasyon dagiti nasao nga establishemento nupay addan ti pammilin nga isardengda ti operasyonda gaputa posible a makumpiskar dagiti kagaawanda ken mapilaan pay dagitoy iti kaso.
Manamnama met a matalantan daytoy iti lokal a konseho para iti panakalawlawag ken panakasulbar ti nasao a pakaseknan.
