Agarup 271 a reklamo kontra iti maatap a vote-buying, vote-selling ken abuse of state resources (ASR) ti naawat ti Commission on Elections (Comelec) Committee on Kontra Bigay (CKB) sumagmamano nga aldaw sakbay ti 2025 midterm elections.
Sigun kenni Commissioner Ernesto Maceda Jr., chairperson ti Committee on Kontra Bigay, nailista ti kangatoan a reports idiay Calabarzon, Central Luzon, National Capital Region, Mimaropa, ken Bicol Region bayat a nailista ti nangato a bilang ti reklamo idiay Laguna, Marikina City, Rizal, Oriental Mindoro, ken Bulacan.
Immunan nga inwaragawag ti COMELEC idi napan a lawas nga adda ti 213 a national ken local candidates ti naipaulogan iti show-cause orders gapu iti maatap a vote-buying, vote-selling, ken abuse of state resources.
Mamati ni Maceda Jr., a dagiti kandidato nga addaan iti pending case ket mabalin pay a madiskwalipikar wenno saan a maiproklama.
