BAGUIO CITY – Imbinsa ni Baguio City Mayor Benjamin Magalong nga awan pay iti panunutna nga agtaray iti nangatngato a posisyon para iti umadani a local ken national election
Iti interview ti Bombo Radyo Baguio, kinunana a nakatutuk daytoy kadagiti mandatu ken trabahona iti agdama kas iti parikot ti pandemya ken nu kasanu a makasubbot iti ekonomiya ti syudad
Gapu iti dayta, kinunana a saan pay a mapagsarsaritaan iti opisina daytoy iti umadani nga election
Innayunna nga adu dagiti nasken a matutukan iti agdama a parikot nga isu laeng ti makakumkumikuman dagitoy iti agdama
Kabayatanna, inaklon ti mayor a saanna a mapagkedkedan ti kiddaw ni Pres. Rodrigo Duterte nga agtalinaed a Contact tracing Czar.
Nupay kasta, kinunana a mamati daytoy a saanen a maidanun pay ti nasao nga isyu iti presidente gaputa adu ita ti parikot a sangsangwen ti pagilian.
Kinunana a dumanon laeng ti isyu kenni vaccine czar Secretary Carlito Galvez ken daytoyen ti agdesisyon.
maipalagip nga immunan a kinunana nga ‘irrevocable’ ti panagikkatna kas Vaccine Czar ti pagilian ngem saan daytoy nga inawat ti National Task Force Against Covid-19 ken ti Malacañang.
Impanamnama met ni Mayor Magalong nga agtultuloy latta iti panangipatungpalna kadagiti mandato ti Contact Tracing Czar ti pagilian agingga awan pay ti napili ken nadutukan a sumukat kenkuana.
