Inwaragawag ni President Ferdinand “Bongbong” Marcos Jr. a maipaayan iti gratuity pay dagiti empleyado nga agtrabtrabaho kas contract of service ken job order iti sidong ti gobyerno.
Maibasar iti Administrative Order nga impaulog ti presidente, dagiti contract of service ken job order workers a nagtrabaho wenno agtrabtrabaho iti gobyerno iti pakabuklan ken saan a bumaba iti uppat a bulan agingga idi Disyembre 15, 2024 ken dagiti kontratada ket sakop ti nasao a petsa, makaawatda iti one-time gratuity pay a saan a sumurok iti P7,000 tunggal fiscal year 2024.
Kabayatanna, dagiti met nagtrabaho iti nababbaba ngem iti uppat a bulan agingga idi Disyembre 15 ken epektibo pailaeng ti kontratada iti nadakamat a petsa ket maipaayan metlaeng iti one-time gratuity pay.
Nu tallo laeng a bulan ti serbisyoda iti gobierno ket makaawatda iti saan a sumurok iti P6,000.
Nu dua met a bulan, makaawat iti saan a sumurok iti P5,000 bayat a nu maysa a bulan ket makaawat iti saan a sumurok iti P4,000.
Dagiti karaman ditoy ket dagiti contract of service ken job order nga agtrabtrabaho iti national government agencies, state universities and colleges, government-owned or -controlled corporations, ken local water districts.
