BAGUIO CITY – Nainget ti panagsagana ti Office of Civil Defense (OCD) – Cordillera para iti panakaisayangkat ti maikatlo a Nationwide Simultaneous Earthquake Drill (NSED) a maangay inton September 9, 2021.
Daytoy ket kalpasan a napili ti Rehiyon Cordillera kas pilot area ti nasao nga aktibidad iti entero a pagilian.
Sigun kenni OCD-Cordillera Information Officer III Harold Lising, napili ti Cordillera kas pilot area ti aktibidad kalpasan a naobserbaran ti Central Office ti ahensia ti kinasagana ti rehiyon iti kanito nga adda ti sumangbay a didigra kas iti gingined.
Kinunana a babaen metlaeng iti daytoy ket makita no kabaelan ti rehion ti panagresponde iti gingined.
Pasetan ti nagduduma nga opisina ditoy siudad ti nasao nga aktibidad a pakairamanan dagiti establishimento a tarigagayda a makipaset.
Impanamnama met ni Lising a masurot dagiti amin a pagalagadan kontra iti COVID-19 kabayatan ti aktibidad nangruna ita nga addan ti pangta ti Delta variant.
