BAGUIO CITY – Naputed ti bakasyon dagiti Pinoy nurse a nakabakasyon ditoy Pilipinas ngem agtatrabaho ita sadiay Saudi Arabia kalpasan a napasubli dagitoy sadiay.
Iti interview ti Bombo Radyo Baguio kenni Timoteo Delicana, maysa a nurse sadiay Jeddah, Saudi Arabia, pinasubli dagitoy dagiti employersda nga ospital tapnu tumulongda kadagitoy.
Kinunana a sangbotenda ti international flight paturong sadiay Jeddah ita nga aldaw gaputa inton bigat, March 15 ket ag-epekton ti travel ban kadagiti Pilipino, partikular dagiti sibilyan a sumrek sadiay Saudi Arabia.
Dinakamatna a mabalin latta dagiti health workers a makastrek sadiay Saudi gapu iti kita ti trabaho dagitoy.
Imbingayna pay a sakbayda a makapagrugi nga agtrabaho manen iti ospital ket maipasidongda pay iti 14-day quarantine.
