Naibalud iti maikatallo a daras ti 39-anyos a lalaki, kalpasan a nakemmeg daytoy idiay Pinsao Proper, Baguio City itay nabiit.
Nabigbig ti suspek kas sigud a dadaulo ti agtatakaw iti siudad ti Baguio City ken iti La Trinidad, Benguet.
Iti agdama, sumangsango ti suspek iti nagtutu-on a kaso, kas iti panaglabsing iti Comprehensive Dangerous Drugs Act of 2002, Comprehensive Firearms and Ammunition Regulation Act, Violation of the Revised Penal Code ken dadduma pay.
Maipalagip nga immunan a napilaan iti kaso ni Mulong idi 2015, gapu iti panaglabsingna iti Illegal Possession of Firearms bayat ti Commissions on Elections Gun Ban ken nawaya-wayaan daytoy kalpasan ti pito a tawen.
Nupay kasta, nakemmeg manen daytoy gapu iti kaso a panagtakaw.
Mabigbigbig ti suspek kas top most wanted iti siudad ti Baguio, Top 10 iti drug list iti Police Regional Office Cordillera ken nabigbig kas dadaulo iti Maraya Robbery Criminal Group manipud 2008 agingga 2015 nga agtigtignay iti siudad ti Baguio ken La Trinidad, Benguet.
Iti agdama, adda itan iti Baguio City Jail Male Dormitory ti suspek bayat a sungbatanna dagiti kasona nga awan ti piyansa a nairekomenda para iti temporario a pannakawayawayana.
