BAGUIO CITY – Napaglibakan ti damag seknan iti panakalugi dagiti vendors iti Baguio City Public Market gapu iti pannakaipatungpal ti Sunday Market Showcase iti Session Road.
Sigun iti Committee Chairwoman ti Market Trade Commerce and Agriculture, bimmaba ti mapaglaklakoan dagiti market vendors ngem saan dagitoy a nalugi gaputa agturturong latta dagiti umili iti merkado publiko ti syudad.
Malaksid iti dayta, sumagmamano kadagiti vendors iti public market ti makipaspaset metlaeng iti nadakamat a market showcase tapnu makasubbotda.
Innaklonna met a naidanun ti nasao a pakaseknan dagiti vendors iti konseho ngem agingga ita ket awan iti naiparang a “winwin solution”.
Iti baet daytoy, kinuna ti chairwoman a saan a maisardeng ti Sunday Market Showcase gaputa adu dagiti babassit a negosyante, kooperatiba ken organisasyon a matultulongan gapu iti daytoy.
Inlawlawagna a karaman kadagiti matultulongan ti nadakamat nga aktibidad ket dagiti Women’s Organization, Barangay, Person with Disability, dagiti napadisi nga Overseas Filipino Workers, artist ken daduma pay.
