“Mabalin kadi nga agpa-hair follicle drug test dagiti kalbo a lallaki ken babbai?”
Daytoy ti saludsod ni Senador Ronald “Bato” dela Rosa iti Philippine Drug Enforcement Agency (PDEA) kagiddan ti kiddawna nga “update” seknan iti singasing ti nasao nga ahensia a maikonsidera ti “hair follicle drug test” kas maysa a kita ti “drug testing.”
Sigun iti nasao nga ahensia, saanda a kabaelan ti hair follicle drug testing, ngem impasiguradoda a pasayaatenda daytoy.
Bayat ti panagdinggeg ti Senate finance subcommittee iti singasing ti PDEA a P3.838 billion a pondo inton 2025, imbinglay ni PDEA Director General Moro Virgilio Lazo a naiparangarang iti bukodda a panagsukimat a ti “hair follicles shaved” manipod iti bagi ti tao ket saan a maaramat para iti “drug tests.”
Daytoy ti nangtignay kenni Dela Rosa a nangsaludsod no dagiti kalbo a kas kenkuana ket mabalin pay laeng a maipasidong iti hair follicle drug test.
Kas sungbat, kinuna ni Lazo a saan a mabalin, karamanen ti buok iti agong ken iti pribado a paset ti bagi.
Kabayatanna, impasigurado ni PDEA Laboratory Service acting director Angela Salvador a ti hair follicle drug test ket umno ken mabalin a makaduktal iti panagusar iti droga iti napalabas a siam a pulo nga aldaw.
