Dandani innem a gasut manipod iti 5,101 a baro a na-diagnose a kaso ti human immunodeficiency virus wenno HIV ti nakipaset iti transactional sex, sigun iti Department of Health (DOH).
Maibasar iti HIV and AIDS surveillance report iti umuna a kwarter ti agdama a tawen, 596 nga indibidual nga agbibiag nga addaan iti HIV ti naduktalan a nakipaset iti “paid sex.”
Sangapulo ket dua a porsiento kadagiti baro a na-diagnose a kaso ti HIV ti nakipaset iti transactional sex iti napalabas a 12 a bulan, sigun paylaeng ti nasao nga ahensia.
Dumanon iti 249 kadagiti kaso ti HIV ti nagbayad para iti “sex” nu sadinno, 248 ti lallaki ken maysa ti babai.
Iti panagadal ti Department of Health, 239 a kaso ti HIV ti nangawat iti bayad a kasukat ti “sex,” pakairamanan ti 231 a lallaki ken walo a babbai.
Iti agdama, kas maibasar iti datos ti nasao nga ahensua, 16,586 a kaso ti HIV ti nairekord sipud idi nangrugi ti reporting ti transactional sex idi December 2012.
Limapulo ket uppat a porsiento wenno 8,962 iti pakabuklan a kaso ti HIV, nga addaan iti pakasaritaan ti paid sex, ti na-diagnose manipud 2020 agingga 2025.
