Dumanon iti sangapulo ket pito ti death toll iti napasamak a panagregaay iti capital ti Uganda a Kampala, sigun iti Red Cross official idi kalman kabayatan ti panakaituloy ti search and rescue operation dagitoy.
Kalpasan ti napasamak a nagsasaruno nga aldaw a panagbayakabak ti tudo idiay Uganda, nangitunda daytoy iti panagcollapse ti kakaisuna a landfill site ti nasao a lugar a nagresulta iti panakagabur dagiti babbalay nga asideg iti landfill site.
Sigun kenni Irene Nakasita, spokesperson ti Uganda Red Cross, narekoberda ti kanayunan nga uppat a bagi a nangnayun iti bilang ti death toll manipud iti sigud a sangapulo ket tallo.
Immunan a naispal dagiti sangapulo ket uppat nga indibidual bayat a manamnama a manayunan daytoy gapu ta posible a natrap dagiti daduma.
Nakikoordinar metten ni President Yoweri Museveni kenni Prime Minister Robinah Nabbanja para iti panakaikkat dagiti agnanaed iti asideg ti pagbasuraan.
Iti agdama, manarimaan ti imbestigasyon dagiti otoridad nu anya ti nagbalin a rason ti panagregaay ken tapno maikkan iti pannusa dagiti opisyales a nangbaybay-an iti obligasyonda.
