Maysa laengin a biktima ti nagcollapse a Binaliw Landfill Facility idiay Cebu ti sarsaraken dagiti otoridad iti agdama kalpasan a narekober ti bagi dagiti 35 a kumpirmado a pimmusay.
Iti kaudian a datos dagiti otoridad, 14 dagiti survivor a nakaruaren ita iti pagagasan, 4 dagiti nakalasat ngem adda paylaeng iti ospital, 35 dagiti pimmusay,ken maysa laengin ti mapukpukaw.
Iti baet dayta, impetteng ti Cebu City Disaster Risk Reduction and Management Council (CCDRRMC) a saan a sumardeng ti search and rescue team iti operasyon dagitoy agingga a masarakanda ti agtaltalinaed a mapukpukaw.
Apaman a masarakanda ti naudi a biktima, marugyanen ti panakaurnong ken beripikar ti pakabigbigan dagitoy maibasar iti rekord dagiti adda iti nasao a disso idi napasamak ti insidente.
Maipatungpal ti cross-checking kadagiti nagnagan ti bikima iti company records ken maikoordinar daytoy kadagiti papamilyada tapno masigurado ti umno a panakabigbig ken dokumentasyon kadagitoy sakbay nga opisyal a maisardeng ti operasyon.
