Puntirya ti delegasyon ti Cordillera a mapasayaat pay ti ranking dagitoy iti umadanin a Palarong Pambansa a maangay idiay Cebu inton Hulyo 6 agingga 15 iti agdama a tawen.
Sigun kenni Gaudencio “Gudz” Gonzales, City Sports & Development Officer, mangnamnama dagitoy a ngumato pay ti ranking ti rehiyon Cordillera manipud iti maika-siyam a pwesto iti napalabas a Palarong Pambansa.
Naituding nga inton Hulyo a kwatro ket umuna nga agturong dagiti atleta idiay Cebu bayat a sumaruno dagiti sports personnel inton Hulyo sais iti agdama a tawen.
Sigun kenni Gonzales, dakkel ti potensyal dagiti atleta ti rehiyon Cordillera iti taekwondo, kadagiti combative sports, archery ken daduma pay.
Nupay kasta, agbalbalin a pakaseknan dagiti nagduduma a local government units (LGUs) ti saan a panakairaman dagiti amin a nangabak iti regional meet kadagiti “measurable sports” kas iti archery, athletics ken swimming ket makipaset iti Palarong Pambansa gapu kadagiti naipayulog nga standards.
Gapu iti dayta, rumbeng a masuportaran ti grassroots a programa maipapan ti tay-ak ti ay-ayam tapno amin ket maipaayan ti gundaway a makisalip.
Kabayatanna, saan a maangay ti Philippine National Games ngem maipatungpal ti Batang Pinoy idiay Palawan inton Disyembre 15 agingga Disyembre 21, ita a tawen.//Bombo Mera Pacpacan
