Nangisayangkat ti Philippine Air Force (PAF) ti departure honors iti base operations ti Villamor Air Base idi Huebes, Nobiembre 6, 2025.
Naipatungpal daytoy kas pammadayaw kadagiti uppat nga airmen a pimmusay iti nag-crashed a Super Huey helicopter sadiay Loreto, Agusan del Sur idi Nobiembre 4, 2025.
Nabigbig dagiti uppat a pimmusay a da Capt. Paulie Dumagan manipud Makati City, 2nd Lt. Royce Louis Camigla ti Pasig City, Sgt. John Christopher Golfo manipud sadiay Noveleta, Cavite, ken A1C Ericson Merico a manipud met iti Real, Quezon.
Kabayatanna, immunan a naisayangkat ti departure honors para iti dua pay a karaman kadagiti innem a pimmusay.
Naangay ti departure honors iti Tactical Operations Wing Eastern Mindanao (TOWEastMin) sadiay Davao City.
Immuna a naisangpet ti bangkay ni Sgt. Yves Sijub, a naiturong iti General Santos City, bayat a ti bangkay ni Airman Ameer Apion ket naiturong met iti Zamboanga City para iti tradisional a pannakaitabon ti muslim.
Impasigurado met ni PAF spokesperson Maria Christina Basco nga awaten dagiti pamilia nga imbati dagiti pimmusay a bannuar ti innem a bulan a sueldo dagitoy.