BAGUIO CITY – Saan a napintas ti nagbalin a partisipasyon dagiti agtutubo ditoy siudad ti Baguio iti kaleppas a Sangguniang Kabataan (SK) election.
Iti panakiyuman ti Bombo Radyo, kinuna ni Evelyn Trinidad, city director ti Department of the Interior and Local Government – Baguio a daytoy ket gaputa manipud iti 128 a barangay ti siudad ket 7 laeng a barangay ti addaan ti kompleto nga SK officials a bukbuklen ti maysa a chairman ken 7 a kagawad.
Innayonna a 9 a barangay ti awanan ti SK chairman bayat a dagiti dadduma ket awanan weno saan a kompleto iti SK kagawad.
Gapu iti daytoy, kinuna ni Trinidad a posible a maisayangkat ti special election a kas nailanad iti linteg ngem nasken nga adda ti umdas a bilang dagiti agtutubo a makipaset iti maangay nga eleksion.
Dinakamatna nga iti linteg ket ti DILG ita ti mangidaulo iti special SK election gaputa ti mapasamaki ket panang-fill-up iti bakante a posisyon.
Iti baet daytoy, ur-urayenda ti pinal a desisyon ti DILG-Central Office gaputa naibaga ni Interior and Local Government Secretary Eduardo Año a posible a dutukanda laengen dagiti agtugaw kadagiti bakante a posisyon iti SK.
Inlawlawagna pay a no appointment ti maaramat ket adu pay ti nasken a maaramid a pagalagadan bayat a no eleksion ket adan ti nabukel a pagalagadan a naar-armat kadagiti napalpalabas nga special election.
