Idagdagadag ni Department of the Interior and Local Government (DILG) Secretary Jonvic Remulla kadagiti local government units (LGUs) nga istrikto nga ipatungpal dagiti pagannurutan maipapan iti paputok kas panagsagana iti panagrambak ti bisperas ti baro a tawen, a panggepna a pabassiten ti bilang dagiti madangran gapu iti paputok.
Iti statement, mabasa a masapul a limitaran dagiti LGU ti panagusar iti paputok ken rumbeng nga adda ti permit ken mangisayangkat kadagiti kampania a mangipakaammo iti publiko ti peggad dagiti maiparit a paputok.
Imbilin pay ti nasao a departamento iti Bureau of Fire Protection (BFP) a siguraduen a dagiti naituding a fireworks display zones ket agtungpal iti Republic Act No. 9514, a maawagan metlaeng iti Fire Code of the Philippines.
Nabilin met ti Philippine National Police (PNP) a mangsamsam ken mangdadael kadagiti illegal a paputok tapno malapdan ti pannakaaramat manen dagitoy.
