Na-“cite in contempt” iti dua a daras ni dismissed Bamban, Tarlac Mayor Alice Guo gapu iti maatap a panagulbudna kadagiti senador.
Daytoy ket kalpasan a maulit-ulit a nagkedked ni Guo a mangsungbat kadagiti saludsod dagiti senador a mainaig iti pudno a kinasiasinona.
Sigun kenni Senador Risa Hontiveros, agtultuloy ti panagulbod ni Alice iti Senate Committee on Women, Children, Family Relations and Gender Equality iti baet nga adda ti ebidensia a daytoy ket addaan ti Chinese a nagan a Guo Hua Ping, nu sadinno ti tatangna ket Chinese a ni Jian Zhong Guo, ken ti nanangna ket ni Lin Wen Yi a maysa metlaeng a Chinese kas maibasar iti naideklara a bank documents daytoy.
Gapu iti daytoy, imbilin ni Hontiveros ti nasao nga addang iti Senado gapu iti panagtestigona iti kinaulbod ken panagliklikna a mangsubat kadagiti damag iti sango ti komite, ken sinuportaran met daytoy ni Senador Joel Villanueva.
Bayat ti panagdinggeg, impaganetget ni Guo a naipasngay daytoy idiay Tarlac ken saan nga idiay China.
Saan pay a kinumpirmar ni Guo a daytoy ket ni Guo Hua Ping kalaksidan iti pannakaduktal ti National Bureau of Investigation (NBI) seknan iti “fingerprints.”
Daytoy ti umuna a nagparang ni Guo iti imbestigasion ti Senado kalpasan a nagbiahe daytoy iti Pilipinas idi Hulio.
Ni Guo ket sumangsango iti reklamo a human trafficking ken dadduma.
Maipalagip nga idi Hulio, imbilin ti Senado a makemmeg ni Guo ken ti pamiliana gapu iti saanda a pannakipaset iti imbestigasion seknan iti na-raid nga POGO hub iti masakupanna a munisipyu.
