BAGUIO CITY – Agserbi kas traffic marshalls dagiti dispatchers wenno barkers dagiti 88 a public utility jeepney (PUJ) associations nga agserserbi iti Baguio-La Trinidad-Itogon-Sablan-Tuba-Tublay (BLISTT) Area.
Mandato dagiti traffic marshalls a tumulong iti implementasyon ti minimum health protocols kontra iti COVID-19 kadagiti commuters iti nagduduma a terminal dagiti parapasahero a jeep iti lokalidad.
Pormal a na-deputize dagiti nasao a dispatchers babaen kenni Baguio City Police Office (BCPO), City Director PCol. Allen Rae Co kagiddan ti panakaiyusuat ti Baguio City Transport Marshalls Program.
Dinayaw met ni Mayor Benjamin Magalong ti inisyatibo dagiti jeepney associations ken dagiti dispatchers a mangbantay iti tunggal maysa ken iti riding public kontra iti pangta ti COVID-19.
Naamuan kenni PCol. Co a nabukel ti Baguio City Transport Marshalls Program kas maibasar iti BCPO Traffic Plan nga addaan ti panagtungpal iti minimum health standards ken dadduma a health and safety protocols.
Maitunos daytoy iti in-inot a panakailukat manen dagiti negosyo ken ti turismo ti Baguio City ken ti Cordillera Region.
Partikular a mandato dagiti traffic marshalls ti mangsukimat no naka-facemask ken naka-face shield ti pasahero, no masursurot ti social distancing sakbay iti panaglugan dagiti nakapila a pasahero ken ti regular a disinfection dagiti jeep sakbay ken kalpasan ti panagbiahe dagitoy.
Ituloy metlaeng dagiti traffic marshalls ti agbantay iti terminal dagitoy ken agisuotda iti vests a mamarkaan ti seal ti Baguio City ken iti ‘BCPO Transport Marshall “Disiplina Muna, Pasahero ko , Bantay Ko” kas uniporme para iti nalaklaka a panakabigbigda.
Sigun pay kenni PCol. Co, awan ti kompensasyon a maawat dagiti traffic marshalls ngem daytoy ti agserbi a kontribusyon dagiti asosasyon dagiti jeep iti kampanya ti Baguio City kontra iti COVID-19.
