BAGUIO CITY – Napilaan ti kaso a shoplifting wenno panaglabsing iti ART 308 ti dua a babai kalpasan a nabigbig dagitoy ti manager a dagitoy ti adda iti likodan ti panagtakaw iti maysa a convenient store sadiay Kennon, Camp 7, Baguio City.
Dagiti dua a babai ket awanan trabaho ken agpada a residente ti Crystal Cave, Baguio City.
Maibasar iti imbestigasyon, dagiti naala dagiti suspek ket sumagmamano a branded nga arak ken grocery items a dumanon iti P20-K ti gatadna nu sadino napasamak ti panagtakaw idi Enero 28.
Nupay kasta, idi nadamag ti manager nga adda ti nakemmeg a babbai gapu iti kapada a kaso, dagus a nagturong daytoy iti kustodiya ti pulisya ken naberepikarna a dagitoy ti nagtakaw kas maibasar iti CCTV footage ti establishimento.
Kabayatanna, agtultuloy a maan-anup ti innem pay a kakadwa dagiti suspek a mangipatpatungpal iti saan a nasayaat nga aramid iti siudad.//Bombo Jerwin Aquino
