BAGUIO CITY – Nauram ti dua a balay idiay Ferdinand, Happy Homes-Campo Sioco, Baguio City itay laeng agsapa.
Dumanon iti sangapulo ket innem nga indibidual ti naapektaran iti napasamak nga uram ken mapatta-patta a dumanon iti P324,000 ti danyos.
Maibasar iti inisyal nga imbestigasyon ti Bureau of Fire Protection (BFP) – Baguio, nangrugi ti uram iti maika-dua a kadsaaran ti maysa a balay a pagnanaedan dagiti pito nga indibidual.
Nairaman pay a nauram ti maysa a balay a kaabayna a pagnanaedan met ti dua a pamilya ken maysa nga estudyante.
Kitkitaen met dagiti otoridad nu ti nakasaksak a charger wenno electrical wire/cord faul ti rason ti uram.
Gapu iti napasamak nga uram ket nagsagrap iti first degree burn ti lalaki nga agtagikua iti balay bayat ti panangiruarna kadagiti dadduma a kagawaan dagitoy.
Iti agdama ket agtaltalinaed dagiti naapektaran a pamilya iti barangay hall.
