BAGUIO CITY – Sumangsangon iti kaso a panaglabsing iti RA 9165 wenno ti Comprehensive Dangerous Drugs Act of 2002 ti dua a big-time drug dealers kalpasan a natiliw dagitoy iti buy-bust operation sadiay Bakras, Bulanao Centro, Tabuk, Kalinga idi Biyernes, July 30, 2021.
Nabigbig dagitoy a da Cindy Paclay Addawi, 40-anyos ken Saldy Solog Wasigan, 28-anyos, agpada nga awanan trabaho ken residente ti Tabuk City.
Agpada pay a nakalista dagitoy nga Street Level Individual a drug personalities.
Nakumpiskar kadagitoy ti 10 a pidaso ti marijuana bricks nga agdagsen ti agarup nasurok 11,000 grams nga aggatad ti mapattapatta a P1.32-M ken ti cellphone ken motorsiklo nga inaramat dagitoy iti transaksion.
Narekober met iti ikot dagitoy ti naaramat a buy-bust money.
