BAGUIO CITY – Natiliw ti dua a drug personalities iti nagsina a buy-bust operation iti siudad ti Baguio ken sadiay Itogon, Benguet idi kanikadua.
Natiliw sadiay Virac, Itogon Benguet ti construction worker/minero a ni Winden Pimentel Baggay alyas Baggay, 29-anyos, residente ti nasao a lugar ken karaman iti Regional Top Ten Drug Personality ti pulisya.
Nakumpiskar kenkuana ti dua a pakete ti maatap a shabu nga agdagsen ti mapattapatta a 3.5 grams ken aggatad ti agarup P24-K ken ti cellphone nga inaramatna iti transaksionda iti operatiba bayat a narekober iti ikotna ti naaramat a buy-bust money.
Kabayatanna, natiliw met sadiay Purok 5, Saint Joseph Village, Baguio City ti vendor a ni Marcelo Quinto Mata alyas Makoy Quinto, 24-anyos, tubo ti Pangasinan, residente ti Trancoville ken nakalista a High-Value Individual iti Directorate for Intelligence.
Nakumpiskar kenkuana ti dua a pakete ti maatap a shabu nga agdagsen ti mapattapatta a 3.3 grams ken aggatad ti nasurok P21,700 bayat a narekober iti ikotna ti naaramat a buy-bust money.
Iti agdama, agpada a sumangsango da Baggay ken Mata iti kaso a panaglabsing iti Comprehensive Dangerous Drugs Act of 2002.
