Imbilin ni Philippine National Police(PNP) Acting Chief PLtGen.Jose Melencio Nartatez Jr. ti panakaipila iti kaso nga administratibo ken criminal kadagiti dua a kamemg iti pulisya manipod idiay Cebu ken idiay Manila.
Ti nasao pulis manipod Manila ket inakusaran iti sexual assault ti maysa nga agtawen iti 27 a babae.
Sigun iti pulisya, nagreport ti biktima iti Volunteers against Crime and Corruption nu sadino, kinunana a rinames daytoy ti nasao a pulis.
Rimwar met iti medico-legal ti biktima ti positibo nga indikasyon iti nasao a krimen ngem pinaglibakan daytoy ti abogado ti suspek.
Iti sabali a bangir, naireklamo met iti kaso a physical abuse ti pulis manipod idiay Cebu kalpasan a maatap a dinangranna ti maysa a person with disability(PWD).
Sigun iti pulisya, agpada nga agmanmaneho iti motorsiklo ti suspek ken ti biktima idi nagpinnudot dagitoy.
Iti naipablaak a CCTV Footage,maimatangan ti panangdandanog ti suspek iti biktima ngem kinuna dagiti kameng iti pulisya idiay Cebu a saanda pay a na-addressan ti nasao nga alegasyon.
Nupay kasta, impetteng ni Nartatez nga amin dagiti maawatda a reklamo kontra kadagiti kameng daytoy ket seryoso a masangsango tapno mapagtalinaed ti dispilina iti PNP ken maipakita kadagiti umili a saanda a kunkunsintiin dagiti anyaman nga aksyon a mangdadael iti integridad ken propesyunalismo iti law enforcement agency.
