Agbalballaag ken agpalpalagip dagiti kameng ti Tuba Municipal Police Station (MPS) iti publiko ken residente a liklikan paylaeng ti panagturong kadagiti karayan nga agdigus, aglangoy wenno agpicnic.
Daytoy ket kalpasan a pimmusay ti estudyante nga agtawen ti 13, bayat nga agtaltalinaed ti ospital ti 12-anyos a menor de edad gapu iti panagdigusda idiay Atad river, Asin Hotspring, Nangalisan, Tuba, Benguet.
Iti pannakiuman ti Bombo Radyo kenni Operation Police Commission Officer Police Luitenant Franklin Dulawan ti Tuba MPS, kinunana a ti biktima a pimmusay ket maysa a Grade 8 student, ken residente ti San Luis, Baguio City, bayat a ti kaduana a nalned ngem naka-survive ket nabigbig a Grade 7 student ken residente metlaeng ti kapada a lugar.
Iti imbestigasyon, nagtulag dagiti agarup sangapulo ket maysa nga aggagayem ken agkakaeskwelaan nga agpada a menor de edad nga apan agdigus ken aglangoy iti nasao a karayan.
Nu ay kasta, bayat ti panaglangoy dagitoy, simmina dagiti tallo a kaduada pakairaman ti dua a biktima a nanggandat nga apan iti nauneg a paset ti karayan a nangitunda iti pannakalned dagitoy.
Rimmuar iti imbestigasyon ti pulisya a dagiti dua a biktima ket saanda nga ammo nga aglangoy a rason a malned dagitoy ti agarup 10 feet.
Iti nasao a gundaway, sumagmamano kadagiti kakadwada ti nakakita nga “struggling” dagiti ubbing rason ti panagkiddawda ti tulong.
Nabaelan met ti maysa a lalaki nga ispalen ti 12-anyos a lalake ngem gapu ti kinapigsa ti ayos ti danum ket saanan a naispal ti 13-anyos.
Iti agarup 12:00 PM, nabaelan metten dagit otoridad, opisyales ken residente a marekober ti bagi ti 13-anyos ngem naideklara a dead-on-arrival iti baet ti panagregget dagiti otoridad a nangispal.
Sigun kenni Dulawan, naiyanod ti ubing iti agarup 10-15 a metro ken nasarakan iti agarup 20-30 minutes kalpasan a timpaw ti bagi ti biktima.
Inlawlawag ti opisyal a ti karayan ket addaan ti paset a narabaw ken paset a nauneg.
Kabayatanna, agtaltalinaed ti 12-anyos iti ospital, nga stable ti kasasaadna bayat a ti pimmusay ket nakamansayag iti lugarda.
Impeksa ni Dulawan a ti karayan ket nakalukat para kadagiti amin ngem daksanggasat gaputa adda ti naaksidente.
Sigun pay kenkuana, daytoy ti kaunaan a nailistada a drowning incident ti nasao a karayan ita a tawen.//Bombo Noveh Organo
