Nagbinnangga ti dua nga eroplano iti tangatang bayat ti “air show performance” wenno panagpabuyada idiay southern Portugal a nakatayan ti maysa a “pilot”.
Karaman kadagiti nagpabuya iti Beja Air Show ket ti innem nga aircraft.
Ti eroplano a naaramat ket ti dua a Yakovlev Yak-52, maysa nga Soviet-designed aerobatic training model.
Dagos a sinuspindir dagiti organizers nga agbuybuya iti nasao a lugar ti programa apaman a naimatanganda iti nasao nga insidente.
Iti maysa a video nga agwarwaras iti social media, maimatangan ti nakaporma nga innem nga eroplano nu sadinno maysa kadagitoy ket agpangato ti posisionna, agparang a sinagidna ti maysa kadagiti dadduma ken dagos a nagdinnungparda.
Sigun kadagiti nakasaksi, paset ti innem nga aircraft iti aerobatic group a napanaganan kas “Yak Stars.”
Ibilbilang dagiti organizers ti nasao nga aktibidad kas kadakkelan a civil aerobatics group iti makin-abagatan nga Europa.
