Dagos a nagresponde dagiti personnel ti Bucay Municipal Police Station nga indauluan ni Police Lieutenant Gleen Joel S. Stimson, ken Abra Police Intervention Unit iti tawag a nangipakaammo iti komosion wenno riribuk idiay Barangay Dugong, Bucay, Abra.
Maibasar iti police report, apaman a nakasangpet dagiti nagresponde a personnel iti lugar a nakapasamakan ti insidente, natiempuanda a nakatakder ti dua nga indibidual iti kalsada nga asideg ti luganda.
Nakita dagiti nagresponde nga opisial a naikabil dagiti ima ti maysa kadagiti indibidual iti uneg ti ratan backpack a naikabil iti barukongna, bayat a ti maysa pay nga indibidual ket nakita nga adda ti rumrumuar a hand grip ti paltog iti sango a siket a nangtignay kadagiti operatiba nga umasideg kadakuada.
Iti nasao metlaeng a gundaway, nakumpiskar manipod iti ikutda ti maysa (1) a Caliber .9MM Berreta nga addaan marka a “MOD 92 DS-CAL 9” nga awan ti serial number, chamber loaded iti 15 live ammunition para iti isu metlaeng a kalibre ken maysa (1) Cal. 38 revolver nga addaan marking “38 9//CTC MADE IN USA” nga awan ti serial number na nga nakargaan ti 5 live ammunition nga isu metlaeng ti kalibre.
Iti agdama, nakabalud dagiti natiliw a suspek iti Bucay Municipal Police Station bayat a maisagsagana ti kaskenan a kaso kontra kadakuada.
Ti pannakatiliw dagiti suspek ket pammaneknek iti saan nga agsarday a dedikasion dagiti otoridad a mangitandudo iti turay ti linteg.
