BANGAO, BUGUIAS – Manarimaan ti imbestigasyon ti Buguias Municipal Police Station nu anya ti rason iti ipupusay dagiti dua nga indibidual ken ti pannakadunor ti maysa pay idiay Bangao, Buguias, Benguet idi rabii.
Iti interview ti Bombo Radyo Baguio iti Buguias Municipal Police Station, nakaawatda ti awag pasado 10:30 pm idi rabii, manipud iti maseknan nga umili maipapan iti nakitana a bagi ti tallo nga indibidual a nakadasay iti kalsada iti nasao a lugar.
Dagus met a nagresponde dagiti otoridad ken ditoy a nadanunanda ti dua a lalaki ken maysa a babai.
Naideklara met a pimmusay dagiti dua a lalaki bayat a naitaray iti ospital ti babai.
Maibasar iti nagwaras a pablaak iti social media, mapapati a naatalan dagiti biktima.
Nupay kasta, sigun kadagiti otoridad, saanda a makumpirmar nu hit-and-run ti napasamak agsipud ta manarimaan ti imbestigasyonda partikular ti panangsapulda iti ebidensiya kas iti CCTV.
Maibasar iti report ti Buguias MPS, dagiti dua a lalaki a pimmusay ket mapatta-patta nga agtawen iti 22 ken 41 bayat a ti babai a naitaray iti ospital ket agtawen iti 38.
Dagiti pimmusay ket taga-Banaue, Ifugao bayat a ti agpapaagas iti ospital ket taga-Abra.
Impanamnama met ti Buguias MPS a mangipaayda iti kanayonan nga impormasyon apaman a makompleto ti ipatpatungpal dagitoy nga imbestigasyon.
This is a developing story……
