Maag agasan ita iti ospital ti sigud a barangay kapitan ken ti kadwana kalpasan a napalpaltogan dagitoy idiay Sitio Ramramot, Barangay San Antonio, Bangued, Abra, alas sais trenta ita a rabii.
Nabigbig dagiti biktima a da Marcelino Castillo Banayos, 58-anyos, sigud a barangay kapitan, residente ti Brgy. Bañacao, Bangued, Abra ken Janssen Benauro Blanes, 20-anyos, construction worker, residente iti nasao metlaeng a barangay.
Iti inisyal nga imbestigasion ti Bangued Municipal Police Station, nakaawatda ti awag manipud iti maseknan nga umili seknan iti napasamak a pammaltog, 100 meter ti kaadayona iti Mudeng Bridge.
Iti kanayonan nga imbestigasion, naduktalan dagiti otoridad a dagiti biktima ket nakalugan iti puraw a Nissan Navarra paturong idiay Barangay San Antonio idi adda ti nang-overtake kadakuada a nangisit a lugan ken ditoy metten a napaputukanda iti paltog.
Gapu iti daytoy, natnag ti lugan dagiti biktima iti kataltalon.
Saan met a napnek dagiti saan pay a nabigbig a suspek ket pinasarunoanda a pinalpaltogan dagiti biktima sakbayda a naglibas.
Nagsagrap ni Banayos iti tama ti paltog iti kannawan a paset ti ulona bayat Blanes ket nagsagrap iti tama ti paltog iti kannigid a takiag ken ulona.
Naitaray met dagiti biktima iti Abra Provincial Hospital babaen kadagiti nagresponde.
Iti agdama ket agtultuloy ti imbestigasyon dagiti otoridad para iti pakabigbigan dagiti suspek ken ti motibo dagitoy.
