BAGUIO CITY – Agpatamtaming iti paggagasan ti dua a lalaki kalpasan a nadangran dagitoy iti aksidente a panakatnag ti naglugananda a truck sadiay Taluy Sur, Tuba, Benguet alas onse itay agsapa.
Nabigbig ti driber a ni Gregor Salvino Oglayon, 39-anyos a residente iti Wangal, La Trinidad, Benguet bayat a nabigbig met ti kadwana a ni Dominador Cagubat, 22-anyos a tubo ken residente iti Aringgay, La Union.
Sigun ken Pol.Maj Leonard Danasen, iti Tuba Municipal Police Station, nagtaud dagiti biktima iti Baguio City ken paturong sadiay Manila idi killaat a naaddaan iti mechanical defect ti naglugananda a truck a nagkarga iti highland vegetables.
Gapu iti daytoy, natnag ti lugan iti agarup 30 feet rason ti panakapasar dagiti biktima iti minor injuries.
Nupay kasta, dagus a naipayaan dagitoy iti first aid babaen iti panagresponde dagiti kameng ti MDRRMO, Bureau of Fire Protection-Tuba ken Tuba MPS.
Iti agdama ket agtaltalinaed paylaeng ti lugan iti disso a nakatnaganna ken manarimaan paylaeng ti panang-imbestigar dagiti otoridad ti pakabuklan a danyos ti napasamak nga aksidente.
