BAGUIO CITY – Nadangran ti dua nga indibidual kalpasan a natnag ti naglugananda a private utility vehicle (Wrangler Type Jeep) iti rangkis sadiay Beling, Caliking, Atok, Benguet pasado alas dos itay malem.
Nabigbig dagitoy a da Joseph Pocles Cawaing, 35-anyos, driver ti nasao a lugan, residente ti Sayangan, Paoay, Atok, Benguet ken Marfil Ligawen Belino, 41-anyos, residente ti Caliking Proper, Atok, Benguet, agpada a mannalon.
Maibasar iti inisyal nga imbestigasyon ti Atok MPS, nagtaud ti nasao a lugan manipud Km.20, Tabeyo, Tublay ken paturong sadiay Caliking Proper, Atok, Benguet.
Nupay kasta, nakapasar iti mechanical defect ti preno ti lugan idi nadanonda ti pasalog a paset ti kalsada rason a napukawan iti kontrol ti driver a nangitunda iti panakatnagda iti rangkis nga addaan kauneg a 10 meters.
Gapu iti daytoy, nagsagrap iti dunor ti driver ken ti pasahero.
Dagus a naiturong dagitoy iti Atok District Hospital babaen iti maseknan nga umili.
Nupay kasta, itay alas singko ti malem ket naiyakar ni Cawaing iti Cordillera Hospital of the Divine Grace sadiay Puguias, La Trinidad, Benguet para iti pannakaagas ti sugat a nasagrap ti rupa, takyag ken luppo daytoy.
Nakaruar metten iti ospital ni Belino kalpasan a naagasan ti sugatna iti takyag ken kaniggid a saka daytoy.
Agtultuloy met a dukduktalen ti Atok MPS ti danyos iti nasao nga insidente.
