Balligi a nakemmeg dagiti dua nga indibidual sadiay North Sanitary Camp Barangay, Baguio City babaen iti drug buy bust operation a naipatungpal.
Dagiti suspek ket pakairamanan ti maysa a babae nga agtawen iti 50, awanan asawa, awanan trabaho ken tubo sadiay Capiz ken ti maysa a lalaki nga agtawen iti 44, maysa a vendor ken tubo sadiay Lanao Del Sur.
Dagitoy ket agpada a residente iti nasao a barangay.
Nakumpiskar manipud iti dua a suspek ti uppat a pidaso ti heat sealed transparent sachet a naglaon iti maatap a shabu nga agdagsen iti agarup 11 grams nga aggatad iti standand drug price a P74,800.
Malaksid iti dayta, nakumpiskar metlaeng ti maysa a pidaso ti genuine 500 peso bill ken 31 a pidaso ti 500 peso bill a boodle money, maysa a pitaka, digital weighing scale, wallet ken dadduma pay.
Balligi a nakemmeg dagiti dua a suspek babaen iti nagtitinulong a pwersa ti Philippine National Police, PDEA-CAR Baguio-Benguet Provincial Office babaen iti koordinasyonda iti RPDEU-CAR ken Baguio City Police Office Station 2.
Naisagana metten dagiti kaskenan a dokumento para iti panakaipila ti kaso kontra kadagiti suspek.//Bombo Noveh Organo
